Beynolxəlğə Tolışə Fond (ITF) iyən Tolışə Milliyə Akademiyə (TMA) çe Əbd- əl-Fəttah Fuməni “Qiloni tarıx” (fars. “Tarix-e Qilan”) risalə (har qılədə de miyonə hisobi 850-1250 işorəku iborət 305 səhifə. De mətni linkədə oşno be bəbe) farsiku bə urusi peqordıniyero tədğıǧotə iyən peqordıniyə qranti sero mısobiqə elon kardedə.

Bə qranti sero ironşınoson (ha jıqo aspiranton) iyən çe farsi zıvoni tərcuməvonon mırociyət karde bəzınen.

Qranti məbləğ: 3000 avro.

Bə XVI-XVIII-nə sasoron farsi zıvoniku mətnon peqordonıye təcrubəş bıə ərizə doəkəson sanqinəti doe bəbe. Ha jıqo nomizədon koon dılədə bə Tolışi iyən Qiloni tarıxi (xısusən XVI-XVIII-nə sasoron) aid nəşron beən sanqinətiye, əncəx bo mısobiqədə iştirokiro məcburi şərt ni.

Ərizədə bəpe nomizədon tərəfo farsi zıvoniku peqordoniyə bıə tərcumon biblioqrafiyə (zıvon, devr iyən/vəya hodison lokalizasiyə nəzəro bə Əbd-əl-Fəttah Fuməni risalə ən nez bıə əsəron siyohi əvvələdə ğeyd kardə bıənine), həmçinin, hestebu, bə İroni tarıxi dair nəşron (devr iyən/vəya hodison lokalizasiyə nəzəro bə Əbd-əl-Fəttah Fuməni risalə ən nez bıə əsəron siyohi əvvələdə ğeyd kardə bıənine) nişo doə bıəninin.

Ərizə həm i nomizədiku, həmən se nəfəriku vey nıbə nomizədon qrupiku təğdım kardə be bəzıne. Dıminə holədə, ərizədə həmə ərizə doəkəson həxədə məlumot co-co əks bıənine. Sıvoy ımi, yekunə mətni bə vahid uslub iyən qrammatikə format varde iyən bə qrant doəkəson maliyə hisoboton doero cəvobdeh bıə qrupi rəhbər mıəyən kardə bıənine. Qrupi dılədə qranti paybaxşi tədğığəkon ıştə arədə mıəyən kardedən, lokin əvon ımi ərizədə nişo kardəninin.

De ərizə bə ivrə risalə iminə fəsli əvvəlinə se səhifə tərcuməən təğdım kardə bıənine. Ərizə nomizədon qrupi tərəfo doə bıəbu, ərizə nıvıştəkəsonku iminə nəfər (çe qrupi rəhbər) iminə fəsli navminə se səhifə tərcumə (çe kitobi 24-26-nə səhifon), ərizə nıvıştəkəsonku dıminə nəfər 4-6-nə səhifon tərcumə (kitobədə 27-29-nə səhifon), ərizə doəkəsonku seminə nəfər 7-9-nə səhifon tərcumə (kitobədə 30-32-nə səhifon) təğdım kardedə. Har qılə tərcuməəkə tərcumə karde tərz co ərizə nıvıştəkəson tərəfo bedeqişəti oqəte bıənine.

Qrant doəkəson bə i ərizə nıvıştəkəsi vəya i ərizəbınıvışton qrupi tərəfo i ərizə ğalib ome sanqinəti doydən, əmmo 3 kəsisən vey nıbıə ərizənıvışton arədə paybaxş karde huğuği ıştəku oqətedən. Bı holədə risalə çe mısobiqə ğalibon arədə bo tərcuməro bə bərobərə poon paybaxş karde bəben. Çe mısobiqə mımkunə dıminə mərhələdə qrant doəkəson de ərizəbınıvışton bardə bıə mısohibon əsosədə qrupi rəhbər mıəyən bəkan. Qrupi rəhbər oxonə mətni bə vahidə stilistik iyən qrammatikə format dənoe cəvobdeh bəbe. Bı holədə qranti məbləği paybaxş bın şikilədə bəbe: mısobiqədə əqəm dı qılə ərizəədə ğalib boy, qrupi lider 1650 avro, dıminə ərizəədə isə 1350 avro bəste; mısobiqədə əqəm se nomizəd ğalib boy, qrupi rəhbər 1180 avro, əmandə dı ərizəədə har qılə 910 avro bəste. Qrant doəkəson vədə maliyə hisobdoəti har ğalibi ehdədə bəmande.

Tərcumə 6 manqi ərzədə (tobə 2024-nə sori 10 oktyabr) orəxənine. Tobə 2024- nə sori 10 noyabr tərcumə ITF iyən TMA əməkdoşon tərəfo bo çapi hozı şikil dənoe bəbe. Səhifon şikilədə qırdə kardə bıə tərcumon sərrost karde ərizənıvışton tərəfo tobə 2024-nə 10 dekabr sori təmom karde bıənine. Tərcumə təmom be-be qrant poə- poə doə bəbe: 1200 avro – mətni 50% tərcumə orəxe bəpeşt (tobə 2024-nə sori 10 iyul), 1200 avro – mətni əmandə 50% tərcumə orəxe bəpeşt (tobə 2024-nə sori 10 oktyabr), 600 avro – mətni tərtiboti iyən yekunə sərrostəti bəpeşt (tobə 2024-nə sori 10 dekabr).

Mırociyət bıkon pentono nışo doə bıə pərdaxti mərhəlon və çe loyihə təmom be qoroş de oxonə tarıxon oqəte şərti çe tərcumə bə vırə rosnero ıştə təğvimon təklif karde huğuğışon heste. Ərizə nomizədon qrupi tərəfo təğdım kardə bıəbu, qrant doəkəson çe loyihə icra mıddəti bə kam be çəş kardedən.

Mısobiqə ğalibon mıəyən kardeədə mırociyət kardəkəson vətəndoşəti iyən jiyə vırə əhəmiyət kəsb kardəni.

Bo qrantiro oxonə mırociyəti tarıx: 21 mart 2024-nə sor, de CET vaxti saat 21:00.

Təğdım kardə bıə ərizon ğeymət noə be bəpeşt qrant doəkəson 1 aprel 2024-nə sor tarıxiku çe mısobiqə ğalib(on) vəya bə mısobiqə dıminə mərhələ ehtiyoc be elon bəkan. Bə dıminə mərhələ dəvardə ərizənıvışton bə onlayn və ya oflayn mısohibə dəvətə məktub vığande bəbe, bə çəvon nəticon əsosən 10 aprel 2024-nə sor tarıxiku mısobiqə ğalib(on) elon karde bəben.

Xahiş kardə bedə ki, ərizəbınıvışton de jintono doə bıə formədə pur kardə bıə ərizon de ıştə testə tərcumon bə ivrə de «Əbd-əl-Fəttah Fuməni. Tərcumə qrant» ğeydi bə info@talyshfund.org iyən tolishi.akademiya@gmail.com elektron adres unvanon bıvığandın.